En 1983 (èri estudiant) dins un ostau rurau de Sisteron, un papafar m'aviá arrapat lo còr, que disiá "nosautres lei païsans, anèm au cinema coma totei. Svp madamiselas, pasmens se venètz d'Africa, vos fau considerar leis òmes de la tèrra". Lo celibat en mitan rurau, avans lei 'Meetic' e autrei malhums especialisats, èra un fenomèn. Pasmens que dire dau meme, mai en China ! Legissi que la sobra d'òmes li es naissut, en 2010, 118 ninets mascles còntra 100 netas. Vint o trenta ans puei farà un òme sus cinc sensa frema... E mai, bòrd que lei fremas en ruralitat chausisson puslèu de quitar sa tèrra per se trobar emplec e marit dins una ciutat. Resultat, l'estatistica mòstra que dins tres regiens ruralas chausidas per un estudi, entre lei celibataris li a 500 òmes per 100 fremas. E, segond resultat, segons l'estudi universitari Bar e Wang de 2022 la responsa de mai que d'un celibatari es lo marridatge constrench amé de joinei fremas imigradas, òubjècte d'un trafegue internacionau. A la frema, rurala ela tanben, li fan miralhejar una China prospèr onte viure serà mai aisat ; lei pauretas se tròban puei dins un país desconegut que n'en parlan pas la lenga... piegèr ! Après qu'auràn parit de son premier net, mai que d'un còp l'òme l'abandonarà. L'estudi a mostrat que lei trafegants comptan sus de fremas elei tanben de la ruralitat dau Kampuchea o dau Myanmar per li provesir de fremas. Am'aquò en 2019 50 Chinés siguèron inculpats per trafegue uman au Pakistan. La solesa païsana afecta pas ren que lei païsans, mai un ceucle uman ben mai important.