Per ma generacien, lei cantaires quebequés tau coma Felix Leclerc o Robert Charlebois, siguèron importants e popularis. Amb elei podiam vèire que maugrat que cantan dins una lenga minoritari (au sieu) podián se faire entendre. Am'aquò quin chale d'apprendre que, de retorn d'un viatge de quinge jorn dins aqueu país de nèu, Miquèu Montanaro n'en tornava amb lei gravaciens d'un disc dei tèxtes de Gilles Vigneault. Vigneault, s'en rementam per lo recitau qu'aviá donat en 1974 dins un luec conéissut coma "Les plaines d'Abraham". E amé sei dos collègas aviá cantat aquela perla : "Gens du pays, c'est votre tour de vous laisser parler d'amour". Montanaro ja vos n'en aviáu parlat perqué l'òme a creat un centre artistic especialisat dins lei musicas dau monde, au mitan dei vinhas, a Correns, dins Var aut. Vaquí que, desenant, enregistra en provençau un tèxte tant celebrissime ! Per èstre segur d'agradar au monde quebequés amé sei très collègas, lei musicians d'aqueu país Liette Remon, Nadia Delisle e Pierre Langevin, a provocat quauquei concèrts de pòcha en cò d'abitants. Es com'aquò que ma collèga Pascala l'a après, dins lo sejornador d'amics... e que me l'a escrich quatecant. Ara lo disc n'en es a l'etapa de la produccien, fau trobar lei dardenas per lo sortir e lo distribuir. Mai ja podètz espinchar vòstrei programas de salas de concèrts, Montanaro vos en regalarà tre avans l'estiu.